الضحى

وَ الضُّحٰی ۙ﴿۱﴾

’’قسم ہے دھوپ چڑھنے کے وقت کی۔‘‘

وَ الَّیۡلِ اِذَا سَجٰی ۙ﴿۲﴾

’’قسم ہے رات کی جبکہ وہ سکون کے ساتھ چھا جائے ۔‘‘

رات میں اندھیرا اور سکون ہے ‘جبکہ دن اُجالے اور حرکت کا مظہرہے۔ ان دو آیات میں رات اور دن کی متضاد خصوصیات کو اس فرمان پر بطور شہادت پیش کیا گیا کہ:

مَا وَدَّعَکَ رَبُّکَ وَ مَا قَلٰی ؕ﴿۳﴾

’’آپؐ کے رب نے آپ کو رخصت نہیں کیا اور نہ ہی وہ آپؐ سے ناراض ہوا ہے۔‘‘

یعنی وحی کے تسلسل میں یہ وقفہ اس وجہ سے نہیں تھا کہ اللہ تعالیٰ آپؐ سے ناراض ہو گیا ہے‘ بلکہ یہ وقفہ ہماری حکمت و مشیت کا حصہ اور آپؐ کی تربیت کا جزو تھا۔ ظاہر ہے نظامِ کائنات میں دن کے اُجالے کے ساتھ رات کی تاریکی کا وجود بھی ناگزیر ہے۔ چنانچہ جس طرح دن کے بعد رات کا آنا ضروری ہے اسی طرح نفس انسانی کے لیے بسط و کشادکی لذت کے ساتھ ساتھ ’’انقباض‘‘ کی کیفیت سے آشنا ہونا بھی ضروری ہے۔

وَ لَلۡاٰخِرَۃُ خَیۡرٌ لَّکَ مِنَ الۡاُوۡلٰی ؕ﴿۴﴾

’’اور یقینا بعد کا وقت آپ کے لیے بہتر ہوگا پہلے سے۔‘‘

یعنی اس وقفے اور ’انقباض‘ کی کیفیت کے بعد آنے والی اب ہر گھڑی اور ہر ساعت آپؐ کے لیے ’انبساط‘ اور انشراح کا نیا پیغام لے کر آئے گی۔ان آیات میں انقباض و انبساط کے حوالے سے جو اصول بیان ہوا ہے اس کی حیران کن حد تک درست ترجمانی غالب ؔنے اپنے اس مصرع میں کی ہے : ؏

یعنی اشعار کی آمد کے حوالے سے کبھی کبھی مجھ پر انقباض کی کیفیت طاری ہو جاتی ہے لیکن جب اس وقفے کے بعد دوبارہ آمد شروع ہوتی ہے تو پھر میری طبیعت کی روانی پہلے سے بھی کہیں زیادہ ہوتی ہے۔ گویاانقباض کے بعد جب انبساط کا مرحلہ آتا ہے تو انسان اپنی پہلی کیفیت کے مقابلے میں ایک درجہ آگے جا چکاہوتا ہے۔

[اس آیت مبارکہ سے یہ مفہوم بھی متبادر ہوتا ہے کہ ’’یقینا ہر آنے والی گھڑی آپؐ کے لیے پہلی سے (بدرجہا) بہتر ہے‘‘۔ آپؐ پر آپ ؐکے رب کے لطف و کرم اور انعام و احسان کا سلسلہ ہمیشہ جاری رہے گا۔ ہر آنے والاوقت گزشتہ حالات سے بہتر سے بہتر ہو گا۔ اس ایک جملہ میں کفار کے طعن و تشنیع اور الزام تراشیوں کا بھی سدباب کر دیا گیا اور اسلام کے درخشاں مستقبل کے بارے میں بھی نوید جانفزا سنا دی گئی۔]

وَ لَسَوۡفَ یُعۡطِیۡکَ رَبُّکَ فَتَرۡضٰی ؕ﴿۵﴾

’’اور عنقریب آپؐ کا رب آپؐ کو اتنا کچھ عطا فرمائے گا کہ آپؐ راضی ہو جائیں گے۔‘‘

یعنی اب بہت جلد آپﷺ کی محنتوں کے ایسے ایسے نتائج آپ ؐکے سامنے آئیں گے کہ انہیں دیکھ کر آپؐ خوش ہو جائیں گے۔ ۱

یہاں پر پچھلی سورت کی آخری آیت کے یہ الفاظ بھی ذہن میں تازہ کر لیں: {وَ لَسَوۡفَ یَرۡضٰی ﴿٪۲۱﴾} گویا جو خوشخبری یہاں حضورﷺ کو سنائی جارہی ہے وہی بشارت سورۃ اللیل میں حضرت ابوبکر رضی اللہ عنہ کو دی گئی ہے۔ دونوں آیات کا اسلوب اصلاً ایک سا ہے‘ صرف ضمیر اور صیغے کا فرق ہے۔ حضورﷺپر چونکہ وحی آتی تھی اس لیے آپؐ کو صیغہ حاضر (تَرْضٰی) میں براہِ راست مخاطب کیا گیا ‘جبکہ حضرت ابوبکر صدیق رضی اللہ عنہ کے لیے غائب کا صیغہ (یَرْضٰی) آیا ہے۔

’’انقباض‘‘ کی مذکورہ کیفیت کے سیاق و سباق میں اب اللہ تعالیٰ حضورﷺ پر اپنے احسانات جتا رہا ہے۔ یہ بھی دراصل حضورﷺ کے لیے تسلی ہی کا ایک انداز ہے۔ جبکہ اس میں ہمارے لیے بھی راہنمائی ہے کہ جب کسی وقت آدمی پر ڈپریشن اور افسردگی کی کیفیت طاری ہو تو اسے چاہیے کہ اس کیفیت میں وہ خصوصی طور پر اللہ تعالیٰ کے احسانات کوگن گن کر یاد کرے کہ اللہ تعالیٰ کس کس انداز میں اس کی مدد کرتا رہا ہے اور کیسی کیسی مشکلات سے اسے نجات دلاتا رہا ہے۔ ظاہر ہے ماضی کے حوالے سے اللہ تعالیٰ کے احسانات یاد کرنے سے ایک پریشان حال آدمی کا حوصلہ بڑھتا ہے اور اس کی مثبت سوچ کو تحریک ملتی ہے۔

اَلَمۡ یَجِدۡکَ یَتِیۡمًا فَاٰوٰی ۪﴿۶﴾

’’کیا اُس نے نہیں پایا آپ کو یتیم ‘پھرپناہ دی!‘‘

یہ آیات سیرت النبیؐ کے مختلف پہلوؤں کو سمجھنے کے حوالے سے بھی بہت اہم ہیں۔ حضورﷺ کے والد آپؐ کی پیدائش سے پہلے ہی وفات پا چکے تھے۔ چنانچہ آپؐ پیدا ہی یتیمی کی حالت میں ہوئے۔ چھ سال کی عمر میں والدہ کا سہارا بھی چھن گیا۔ دادا نے اپنی کفالت میں لیا تو دو سال بعد وہ بھی چھوڑ کر چلے گئے۔ تایا زبیر بن عبدالمطلب سرپرست بنے تو کچھ عرصہ بعد ان کا بھی انتقال ہوگیا (حضورﷺ کی کفالت کے حوالے سے آپؐ کے تایا زبیر بن عبدالمطلب کا ذکر اکثر تاریخی حوالوں میں موجود ہی نہیں۔ایسا دراصل جناب ابوطالب کے کردار کو زیادہ نمایاں کرنے کے لیے جان بوجھ کر باقاعدہ سوچے سمجھے منصوبے کے تحت کیا گیا ہے)۔اس کے بعد جناب ابوطالب نے آپﷺ کے سرپردست شفقت رکھااور انہی کی سرپرستی میں آپؐ جوانی کی عمر کو پہنچے۔ آیت کے لفظ ’’فَاٰوٰی‘‘ میں ان تمام دنیوی سہاروں کی طرف اشارہ ہے جو ظاہر ہے آپؐ کو اللہ تعالیٰ نے فراہم کیے تھے اور اللہ تعالیٰ نے ہی ان تمام رشتہ داروں کے دلوں میں آپؐ کے لیے محبت اورچاہت پیدا کی تھی۔ اسی نے آپؐ کی شخصیت ایسی بنائی تھی کہ جوکوئی آپؐ کو دیکھتا آپؐ کا گرویدہ ہو جاتاتھا۔اسی طرح اللہ تعالیٰ نے حضرت موسیٰ علیہ السلام کو بھی بچپن میں سہارا دیا تھا۔ سورئہ طٰہٰ میں اللہ تعالیٰ کی اس قدرت اور حکمت کا ذکر اس طرح آیا ہے: {وَ اَلۡقَیۡتُ عَلَیۡکَ مَحَبَّۃً مِّنِّیۡ ۬ۚ } (آیت۳۹) کہ اے موسیٰ ؑمیں نے آپ پر اپنی محبت کا پرتو ڈال دیا تھا جس کی وجہ سے لوگ آپ کو دیکھ کر متاثر ہو جاتے تھے اور یوں وہ آپؑ کو قتل کرنے سے باز رہے۔

وَ وَجَدَکَ ضَآلًّا فَہَدٰی ۪﴿۷﴾

’’اور آپؐ کو تلاشِ حقیقت میں سرگرداں پایا تو ہدایت دی!‘‘

جب آپؐ شعور کی پختگی کی عمر کو پہنچے اور آپؐ نے کائنات کے حقائق کے بارے میں غوروفکر کرنا شروع کیا تو اللہ تعالیٰ نے وحی کے ذریعے آپؐ کو راہنمائی فراہم کر دی۔ ۱

وَ وَجَدَکَ عَآئِلًا فَاَغۡنٰی ؕ﴿۸﴾

’’اور اس نے آپؐ کو تنگ دست پایا تو غنی کر دیا!‘‘

اس کے لیے اللہ تعالیٰ نے حضرت خدیجہ رضی اللہ عنہاکی ساری دولت آپﷺ کے قدموں میں ڈھیر کر دی۔ حضرت خدیجہؓ بہت مال دار اور صاحب حیثیت خاتون تھیں۔ مکہ کے بڑے بڑے سرداران ؓسے نکاح کے خواہش مند تھے‘ مگر اللہ تعالیٰ نے انؓ کا دل آپﷺ کی طرف پھیر دیااور انہوںؓ نے خود آپؐ کو نکاح کا پیغام بھجوایا۔

گزشتہ آیات میں حضورﷺ کی زندگی کے تین مراحل کے حوالے سے تین احسانات کا ذکر کرنے کے بعد اب اسی ترتیب سے آپﷺ کو تین ہدایات دی جا رہی ہیں:

فَاَمَّا الۡیَتِیۡمَ فَلَا تَقۡہَرۡ ؕ﴿۹﴾

’’تو آپؐ کسی یتیم پر سختی نہ کریں۔‘‘

جیسے آپؐ کی یتیمی میں اللہ تعالیٰ نے آپؐ کی کفالت وغیرہ کا بندوبست کیا‘ اسی طرح اب آپؐ بھی یتیموں کی سرپرستی کریں اور انہیں لوگوں کی زیادتیوں سے بچائیں۔

وَ اَمَّا السَّآئِلَ فَلَا تَنۡہَرۡ ﴿ؕ۱۰﴾

’’اور آپؐ کسی سائل کو نہ جھڑکیں۔‘‘

ایک وقت تھا جب آپؐ حقیقت کی تلاش میں سرگرداں تھے اور ہم نے آپ ؐکو ہدایت عطا فرمائی تھی۔ اب اگر آپؐ کے پاس کوئی سائل اپنی حاجت لے کر آئے تو اس کی حاجت روائی کریں اور اسے جھڑکیں نہیں۔ ظاہر ہے سائل بھی کئی طرح کے ہوتے ہیں۔ کوئی مالی معاونت کے لیے سوال کرتا ہے تو کوئی علم کی تلاش میں لوگوں کے دروازوں پر دستک دیتا ہے ۔

وَ اَمَّا بِنِعۡمَۃِ رَبِّکَ فَحَدِّثۡ ﴿٪۱۱﴾

’’اور اپنے رب کی نعمت کا بیان کریں۔‘‘

یہ ہدایت جو آپؐ کو عطا ہوئی ہے ‘ یہ آپؐ کے رب کی بہت بڑی نعمت ہے۔ اللہ تعالیٰ کی اس نعمت پر شکر کا تقاضا ہے کہ آپؐ اس کی اس نعمت کاچرچا کریں اور اسے زیادہ سے زیادہ لوگوں تک پھیلائیں۔اس حکم میں ہمارے لیے بہت بڑا سبق ہے۔ ہدایت کی نعمت کو اگر انسان اپنی ذات تک محدود کر کے بیٹھ رہے تو اس کا یہ طرزِعمل بخل کے مترادف ہو گا۔ لہٰذا جس کسی کو اللہ تعالیٰ ہدایت کی دولت سے نوازے اسے چاہیے کہ اس خیر کو عام کرے اور اسے زیادہ سے زیادہ لوگوں تک پہنچانے کی کوشش کرے۔

٭٭٭