يونس

قُلۡ یٰۤاَیُّہَا النَّاسُ اِنۡ کُنۡتُمۡ فِیۡ شَکٍّ مِّنۡ دِیۡنِیۡ

’’(اے نبیﷺ!) کہہ دیجیے کہ اے لوگو! اگر تمہیں میرے دین کے بارے میں کوئی شک ہے‘‘

اب سورۃ کے آخر میں فیصلہ کن انداز میں خطاب کیا جا رہا ہے کہ اے لوگو! یہ جو تم مجھ پر دباؤ ڈال رہے ہو‘کہ میں اپنے موقف میں کچھ نرمی پیدا کرلوں یا تمہارے ساتھ کسی حد تک مداہنت (compromise) کا رویہ اختیار کروں ‘تو اس کا مطلب تو یہ ہے کہ تمہیں میرے دین کے بارے میں ابھی تک شک ہے۔ اگر ایسا ہے تو تم لوگ اپنا یہ شک دور کر لو:

فَلَاۤ اَعۡبُدُ الَّذِیۡنَ تَعۡبُدُوۡنَ مِنۡ دُوۡنِ اللّٰہِ وَ لٰکِنۡ اَعۡبُدُ اللّٰہَ الَّذِیۡ یَتَوَفّٰىکُمۡ ۚۖ

’’تو(جان لو کہ) میں ہر گز نہیں پوجنے والا اُن کو جن کو تم پوجتے ہو اللہ کے سوا ‘بلکہ میں تو پوجوں گا اُسی اللہ کو جو تمہیں قبض کرے گا۔‘‘

وَ اُمِرۡتُ اَنۡ اَکُوۡنَ مِنَ الۡمُؤۡمِنِیۡنَ ﴿ۙ۱۰۴﴾

’’اور مجھے حکم ہوا ہے کہ میں ایمان لانے والوں سے ہوجاؤں۔‘‘

وَ اَنۡ اَقِمۡ وَجۡہَکَ لِلدِّیۡنِ حَنِیۡفًا ۚ

’’اور یہ کہ آپؐ اپنا رخ سیدھا رکھیے دین کی طرف یکسوہو کر۔‘‘

پورے حنیف یعنی یکسو ہو کر دین کی طرف متوجہ ہو ں۔

وَ لَا تَکُوۡنَنَّ مِنَ الۡمُشۡرِکِیۡنَ ﴿۱۰۵﴾

’’اور ہر گز نہ ہوں ان مشرکوں میں سے۔‘‘

وَ لَا تَدۡعُ مِنۡ دُوۡنِ اللّٰہِ مَا لَا یَنۡفَعُکَ وَ لَا یَضُرُّکَ ۚ فَاِنۡ فَعَلۡتَ فَاِنَّکَ اِذًا مِّنَ الظّٰلِمِیۡنَ ﴿۱۰۶﴾

’’اور مت پکاریئے اللہ کے سوا اس کو جو نہ تمہیں نفع دے سکے نہ نقصان‘اور اگر (بالفرض) آپؐ نے ایسا کیا تو پھرآپ بھی ظالموں میں سے ہو جائیں گے۔‘‘

وَ اِنۡ یَّمۡسَسۡکَ اللّٰہُ بِضُرٍّ فَلَا کَاشِفَ لَہٗۤ اِلَّا ہُوَ ۚ

’’اور اگر اللہ آپ کو کوئی ضرر پہنچائے‘ تو کوئی نہیں ہے اس کو دُور کرنے والا سوائے اللہ کے۔‘‘

وَ اِنۡ یُّرِدۡکَ بِخَیۡرٍ فَلَا رَآدَّ لِفَضۡلِہٖ ؕ

’’اور اگر وہ ارادہ کر لے آپؐ کے ساتھ بھلائی کا تو اُس کے فضل کو لوٹانے والا کوئی نہیں۔‘‘

یُصِیۡبُ بِہٖ مَنۡ یَّشَآءُ مِنۡ عِبَادِہٖ ؕ وَ ہُوَ الۡغَفُوۡرُ الرَّحِیۡمُ ﴿۱۰۷﴾

’’ وہ پہنچاتا ہے اس ( فضل) کو اپنے بندوں میں سے جسے چاہے‘ اور وہ بخشنے والا ‘رحم کرنے والا ہے۔‘‘

قُلۡ یٰۤاَیُّہَا النَّاسُ قَدۡ جَآءَکُمُ الۡحَقُّ مِنۡ رَّبِّکُمۡ ۚ فَمَنِ اہۡتَدٰی فَاِنَّمَا یَہۡتَدِیۡ لِنَفۡسِہٖ ۚ

’’کہہ دیجیے کہ اے لوگو! تمہارے پاس حق آ چکا ہے تمہارے رب کی طرف سے۔تو اب جو کوئی بھی ہدایت پائے گاوہ اپنے بھلے کو ہی ہدایت پائے گا۔‘‘

اس ہدایت کا فائدہ اسی کو ہو گا‘عاقبت اسی کی سنورے گی اور اللہ کی رحمت اس کے شامل حال ہو گی۔

وَ مَنۡ ضَلَّ فَاِنَّمَا یَضِلُّ عَلَیۡہَا ۚ وَ مَاۤ اَنَا عَلَیۡکُمۡ بِوَکِیۡلٍ

’’اور جو کوئی بھٹک جائے گا تو وہ بھی اپنی جان پر ہی وبال لے گا۔اور میں تمہارا ذمہ دار نہیں ہوں۔‘‘

مجھے تمہارے اوپر کوئی داروغہ مقرر نہیں کیا گیا۔ میں تمہارے بارے میں مسئول نہیں ہوں۔ اللہ کے ہاں تمہارے بارے میں مجھ سے باز پرس نہیں ہو گی کہ یہ ایمان کیوں نہیں لائے تھے؟ {وَّ لَا تُسۡئَلُ عَنۡ اَصۡحٰبِ الۡجَحِیۡمِ ﴿۱۱۹﴾} (البقرۃ) ’’اور آپؐ سے نہیں پوچھا جائے گا جہنمیوں کے بارے میں!‘‘

وَ اتَّبِعۡ مَا یُوۡحٰۤی اِلَیۡکَ وَ اصۡبِرۡ

’’اور (اے نبیﷺ!) آپؐ پیروی کرتے جایئے اُس کی جو آپ کی طرف وحی کیا جا رہا ہے اور صبر کیجیے‘‘

اپنے موقف پر جمے رہیے اور ڈٹے رہیے ‘مشکلات کے دبائو کو برداشت کیجیے۔

حَتّٰی یَحۡکُمَ اللّٰہُ ۚۖ وَ ہُوَ خَیۡرُ الۡحٰکِمِیۡنَ ﴿٪۱۰۹﴾

’’یہاں تک کہ اللہ فیصلہ کر دے ‘اور یقینا وہ بہترین فیصلہ کرنے والا ہے۔‘‘

بارک اللّٰہ لی ولکم فی القرآن العظیم ونفعنی وایاکم بالآیات والذِّکر الحکیمoo