آل عمران

وَ اِذۡ غَدَوۡتَ مِنۡ اَہۡلِکَ تُبَوِّیُٔ الۡمُؤۡمِنِیۡنَ مَقَاعِدَ لِلۡقِتَالِ ؕ

’’اور (اے نبیﷺ!) یاد کیجیے جبکہ صبح کو آپؐ اپنے گھر سے نکلے تھے اور مسلمانوں کو جنگ کے مورچوں میں مامور کر رہے تھے۔‘‘

یہ غزوۂ اُحد کی صبح حضورﷺ کے حضرت عائشہ رضی اللہ عنہاکے حجرے سے باہر تشریف لانے اور جنگ کے میدان میں پہنچ کر مسلمانوں کی صف بندی کرنے کا ذکر ہے کہ آپؐ ایک ایک مورچے پر خود صحابہ کرام رضوان اللہ علیہم اجمعین کو مامور کر رہے تھے۔

وَ اللّٰہُ سَمِیۡعٌ عَلِیۡمٌ ﴿ۙ۱۲۱﴾

’’جبکہ اللہ سب کچھ سننے والا جاننے والا ہے۔‘‘

اِذۡ ہَمَّتۡ طَّآئِفَتٰنِ مِنۡکُمۡ اَنۡ تَفۡشَلَا ۙ

’’جبکہ تم میں سے دو گروہ بزدلی دکھانے پر آمادہ ہو گئے تھے‘‘

وَ اللّٰہُ وَلِیُّہُمَا ؕ

’’حالانکہ اللہ ان کا پشت پناہ تھا۔‘‘

وَ عَلَی اللّٰہِ فَلۡیَتَوَکَّلِ الۡمُؤۡمِنُوۡنَ ﴿۱۲۲﴾

’’اور اللہ ہی پر توکل کرنا چاہیے اہل ایمان کو۔‘‘

جنگ کے آغاز سے پہلے انصار کے دو گھرانوں بنو حارثہ اور بنوسلمہ کے قدم وقتی طور پر ڈگمگا گئے تھے‘ بربنائے طبع بشری ان کے حوصلے پست ہونے لگے تھے اور انہوں نے واپسی کا ارادہ کر لیا تھا‘ لیکن اللہ تعالیٰ نے ان کے دلوں کو ثبات عطا فرمایا اور ان کے قدموں کو جما دیا۔ پھر ان کا ذکر قرآن میں کر دیا گیا۔ وہ لوگ اس پر فخر کیا کرتے تھے کہ ہم وہ لوگ ہیں جن کا ذکر اللہ تعالیٰ نے قرآن میں {مِنْکُمْ} اور {وَ اللّٰہُ وَلِیُّہُمَا ؕ} کے الفاظ میں کیا ہے۔ غور طلب بات یہ ہے کہ تین سو منافقین جو میدانِ جنگ سے چلے گئے تھے اللہ تعالیٰ نے ان کا ذکر تک نہیں کیا۔ گویا وہ اس لائق بھی نہیں تھے کہ ان کا براہِ راست ذکر کیاجاتا۔ البتہ ان آیات کے آخر میں ان کا ذکر بالواسطہ طور پر (indirectly) آئے گا۔

وَ لَقَدۡ نَصَرَکُمُ اللّٰہُ بِبَدۡرٍ وَّ اَنۡتُمۡ اَذِلَّۃٌ ۚ

’’اور اللہ نے تو تمہاری مدد بدر میں بھی کی تھی جبکہ تم بہت کمزور تھے۔‘‘

غزوۂ بدر میں ایک ہزار مشرکین کے مقابلے میں اہل ایمان صرف تین سو تیرہ تھے‘ جبکہ ان سب کے پاس تلواریں بھی نہیں تھیں‘ بلکہ پورے لشکر میں کل آٹھ تلواریں تھیں۔ کفارِ مکہ ایک سو گھوڑوں کا رسالہ لے کر آئے تھے اور ادھر صرف دو گھوڑے تھے۔ اُدھر سات سو اونٹ تھے اور اِدھر ستر اونٹ تھے۔ اس سب کے باوجود اللہ نے تمھاری مدد کی تھی اور تمہیں اپنے سے طاقتور دشمن پر غلبہ عطا فرما دیا تھا۔

فَاتَّقُوا اللّٰہَ لَعَلَّکُمۡ تَشۡکُرُوۡنَ ﴿۱۲۳﴾

’’تو اللہ کا تقویٰ اختیار کرو تاکہ تم اللہ کا (صحیح معنی میں) شکر ادا کر سکو۔‘‘

اِذۡ تَقُوۡلُ لِلۡمُؤۡمِنِیۡنَ اَلَنۡ یَّکۡفِیَکُمۡ اَنۡ یُّمِدَّکُمۡ رَبُّکُمۡ بِثَلٰثَۃِ اٰلٰفٍ مِّنَ الۡمَلٰٓئِکَۃِ مُنۡزَلِیۡنَ ﴿ؕ۱۲۴﴾

’’(اے نبیﷺ!) جب آپ کہہ رہے تھے اہل ایمان سے کہ کیا تمہارے لیے یہ کافی نہیں ہے کہ تمہارا ربّ تمہاری مدد کرے تین ہزار فرشتوں سے جو آسمان سے اُترنے والے ہوں گے؟‘‘

یعنی اے مسلمانو! اگر مقابلے میں تین ہزار کا لشکر آ گیا ہے تو کیا غم ہے۔ میں تمہیں خوشخبری دیتا ہوں کہ اللہ تعالیٰ تمہاری مدد کو آسمان سے تین ہزار فرشتے بھیجے گا ۔اللہ تعالیٰ نے اپنے نبیﷺ کی اس خوشخبری کو ‘ جو ایک طرح سے گویا استدعا بھی تھی‘ فوری طور پر شرفِ قبولیت عطا فرمایا اور اس کی منظوری کا اعلان فرما دیا۔

بَلٰۤی ۙ اِنۡ تَصۡبِرُوۡا وَ تَتَّقُوۡا وَ یَاۡتُوۡکُمۡ مِّنۡ فَوۡرِہِمۡ ہٰذَا

’’کیوں نہیں )اے مسلمانو!)اگر تم صبر کرو گے اور تقویٰ کی روش پر رہو گے اور اگر وہ فوری طور پر تم پر حملہ آور ہو جائیں‘‘

یُمۡدِدۡکُمۡ رَبُّکُمۡ بِخَمۡسَۃِ اٰلٰفٍ مِّنَ الۡمَلٰٓئِکَۃِ مُسَوِّمِیۡنَ ﴿۱۲۵﴾

’’تو تمہارا ربّ تمہاری مدد کرے گا پانچ ہزار فرشتوں کے ذریعے سے جو نشان زدہ گھوڑوں پر آئیں گے۔‘‘

وَ مَا جَعَلَہُ اللّٰہُ اِلَّا بُشۡرٰی لَکُمۡ

’’اور اللہ نے اس کو نہیں بنایا مگر تمہارے لیے بشارت‘‘

وَ لِتَطۡمَئِنَّ قُلُوۡبُکُمۡ بِہٖ ؕ

’’اور تاکہ تمہارے دل اس سے مطمئن ہو جائیں۔‘‘

ؕ وَ مَا النَّصۡرُ اِلَّا مِنۡ عِنۡدِ اللّٰہِ الۡعَزِیۡزِ الۡحَکِیۡمِ ﴿ۙ۱۲۶﴾

’’ورنہ مدد تو ہونی ہی اللہ کی طرف سے ہے جو غالب اور حکمت والا ہے۔‘‘

یہ تو اللہ تعالیٰ کی طرف سے بشارت کے طور پر تمہارے دلوں کے اطمینان کے لیے تمہیں بتا دیا گیا ہے‘ ورنہ اللہ تعالیٰ فرشتوں کو بھیجے بغیر بھی تمہاری مدد کر سکتا ہے ‘ وہ ’’کُن فیکون‘‘ کی شان رکھتا ہے۔ تمہیں یہ بشارت تمہاری طبع بشری کے حوالے سے دی گئی ہے کہ اگر تین ہزار کی تعداد میں دشمن سامنے ہوا تو تمہاری مدد کو تین ہزار فرشتے اتر آئیں گے ‘ اور اگر وہ فوری طور پر حملہ آور ہو گئے تو اللہ تعالیٰ پانچ ہزار فرشتے بھیج دے گا۔

لِیَقۡطَعَ طَرَفًا مِّنَ الَّذِیۡنَ کَفَرُوۡۤا

’’(اور یہ مدد وہ تمہیں اس لیے دے گا) تاکہ کافروں کا ایک بازو کاٹ دے ‘‘

اَوۡ یَکۡبِتَہُمۡ فَیَنۡقَلِبُوۡا خَآئِبِیۡنَ ﴿۱۲۷﴾

’’یا انہیں ذلیل کر دے کہ وہ خائب و خاسر ہو کر لوٹ جائیں۔‘‘

ان آیات کے مطالعہ کے دوران یہ بات ذہن میں رہے کہ یہاں غزوۂ اُحد کے حالات و واقعات کا ذکر اور ان پر تبصرہ زمانی ترتیب سے نہیں ہے۔ جیسا کہ سب سے پہلے رسول اللہﷺ کا اپنے گھر سے نکل کر میدانِ جنگ میں مورچہ بندی کا ذکر ہوا۔ پھر اس سے پہلے کے حالات کے بارے میں بتایا گیا کہ جب خبریں پہنچی ہوں گی کہ تین ہزار کا لشکر مدینہ پر حملہ آور ہونے کے لیے آ رہا ہے اور رسول اللہﷺ نے اہل ایمان کو اللہ تعالیٰ کی مدد و نصرت کی خوشخبری دی ہو گی۔اب اس جنگ کے دوران مسلمانوں سے جو کچھ خطائیں اور غلطیاں ہوئیں ان کی نشان دہی کی جا رہی ہے۔ خود آنحضورﷺ سے بھی خطا کا ایک معاملہ ہوا‘ اس پر بھی گرفت ہے‘ بلکہ سب سے پہلے اسی معاملے کو لیا جا رہا ہے۔ جب آپﷺ شدید زخمی ہو گئے اور آپؐ پر بے ہوشی طاری ہو گئی‘ پھر جب ہوش آیا تو آپﷺ کی زبان پر یہ الفاظ آ گئے:

حدیث ((کَیْفَ یُفْلِحُ قَوْمٌ خَضَبُوْا وَجْہَ نَبِـیِّھِمْ بِالدَّمِ وَھُوَ یَدْعُوْھُمْ اِلَی اللّٰہِ)) ۱

’’یہ قوم کیسے فلاح پائے گی جس نے اپنے نبی کے چہرے کو خون سے رنگ دیا جبکہ وہ انہیں اللہ کی طرف بلا رہا تھا!‘‘

تلوار کا وار آنحضورﷺ کے رُخسار کی ہڈی پر پڑا تھا اور اس سے آپؐ کے دودانت بھی شہید ہو گئے تھے۔ زخم سے یکدم خون کا فوارہ چھوٹ پڑا جس سے آپﷺ کا پورا چہرئہ مبارک لہولہان ہو گیااور خون زیادہ مقدار میں بہہ جانے کی وجہ سے آپﷺ پر بے ہوشی طاری ہو گئی۔ آپﷺ ہوش میں آئے تو زبانِ مبارک سے یہ الفاظ اداہو گئے۔ اس پر یہ آیت نازل ہوئی: {لَـیْسَ لَکَ مِنَ الْاَمْرِ شَیْئٌ …} اے نبیﷺاس معاملے میں آپؐ ‘کا کوئی اختیار نہیں ہے‘ آپؐ ‘کا کام دعوت دینا اور تبلیغ کرنا ہے۔ لوگوں کی ہدایت اور ضلالت کے فیصلے ہم کرتے ہیں۔ اور اللہ تعالیٰ کے فیصلوں کا انداز دیکھئے کہ جس شخص کی وجہ سے مسلمانوں کو یہ ہزیمت اٹھانا پڑی ‘یعنی خالد ابن ولید‘ اللہ تعالیٰ نے حضورﷺ ہی کی زبانِ مبارک سے اسے ’’سَیفٌ مِن سُیوفِ اللّٰہ‘‘ (اللہ کی تلواروں میں سے ایک تلوار) کا خطاب دلوا دیا۔

لَیۡسَ لَکَ مِنَ الۡاَمۡرِ شَیۡءٌ

’’(اے نبیﷺ!) اس معاملے میں آپ کو کوئی اختیار نہیں‘‘

اَوۡ یَتُوۡبَ عَلَیۡہِمۡ اَوۡ یُعَذِّبَہُمۡ

’’اللہ ان کی توبہ قبول کرے یا انہیں عذاب دے‘‘

یہ اللہ کے اختیار میں ہے‘ وہ چاہے گا تو ان کو توبہ کی توفیق دے دے گا‘ وہ ایمان لے آئیں گے‘یااللہ چاہے گا تو انہیں عذاب دے گا۔

فَاِنَّہُمۡ ظٰلِمُوۡنَ ﴿۱۲۸﴾

’’اس لیے کہ وہ ظالم ہیں۔‘‘

ان کے ظالم ہونے میں کوئی شبہ نہیں‘ لہٰذا وہ سزا کے حق دار تو ہو چکے ہیں۔ لیکن ہو سکتا ہے اللہ انہیں ہدایت دے دے ۔ دیکھئے‘ یہ وقت وقت کی بات ہوتی ہے۔ چند سال پہلے طائف میں رسول اللہﷺ سے جس طرح بدسلوکی کا مظاہرہ کیا گیا وہ آپؐ کی زندگی کا شدید ترین دن تھا۔اس پر جبرائیل علیہ السلام نے آکر کہا کہ یہ ملک الجبال حاضر ہے۔ یہ کہتا ہے کہ مجھے اللہ نے بھیجا ہے ‘آپؐ فرمائیں تو ان دونوں پہاڑوں کو ٹکرا دوں جن کے مابین وادی کے اندر یہ شہر طائف آباد ہے‘ تاکہ یہ سب پس جائیں‘ ان کا سرمہ بن جائے ۔ آپﷺ نے فرمایا نہیں!کیا عجب کہ اللہ تعالیٰ ان کی آئندہ نسلوں کو ہدایت دے دے۔ لیکن یہ وقت کچھ ایسا تھا کہ بربنائے طبع بشری زبان مبارک سے وہ جملہ نکل گیا اور اس پر یہ آیت نازل ہوگئی۔ظاہر ہے : ؎

اَلْعَبْدُ عَبْدٌ وَاِنْ تَرَقّٰی وَالرَّبُّ رَبٌّ وَاِنْ تَنَزَّلْ

’’ بندہ بندہ ہی رہتا ہے چاہے کتنا ہی بلند ہو جائے‘ اورربّ‘ ربّ ہی ہے چاہے کتنا ہی نزول فرما لے !‘‘

وَ لِلّٰہِ مَا فِی السَّمٰوٰتِ وَ مَا فِی الۡاَرۡضِ ؕ

’’اللہ ہی کے لیے ہے جو کچھ آسمانوں میں ہے اور جو کچھ زمین میں ہے۔‘‘

یَغۡفِرُ لِمَنۡ یَّشَآءُ وَ یُعَذِّبُ مَنۡ یَّشَآءُ ؕ

’’وہ جس کو چاہتا ہے بخش دیتا ہے اور جس کو چاہتا ہے عذاب دیتا ہے۔‘‘

وَ اللّٰہُ غَفُوۡرٌ رَّحِیۡمٌ ﴿٪۱۲۹﴾

’’اوراللہ غفور و رحیم ہے۔‘‘