الأحزاب

لَئِنۡ لَّمۡ یَنۡتَہِ الۡمُنٰفِقُوۡنَ وَ الَّذِیۡنَ فِیۡ قُلُوۡبِہِمۡ مَّرَضٌ

’’اگر باز نہ آئے یہ منافق اور وہ لوگ جن کے دلوں میں روگ ہے‘‘

وَّ الۡمُرۡجِفُوۡنَ فِی الۡمَدِیۡنَۃِ

’’اور جو مدینہ میں سنسنی پھیلانے والے ہیں‘‘

منافقین کی عادت بن گئی تھی کہ وہ ماحول میں سنسنی پھیلانے کے لیے طرح طرح کی من گھڑت ہیجان انگیز افواہیں پھیلاتے رہتے تھے۔ ان افواہوں سے ان کا مقصد مسلمانوں کا حوصلہ پست کرنا اور ان کی اخلاقی ساکھ کو گرانا ہوتا تھا۔ انہیں خبردار کرنے کے لیے فرمایا گیاکہ اگر یہ لوگ ان حرکات سے باز نہ آئے :

لَنُغۡرِیَنَّکَ بِہِمۡ

’’تو (اے نبیﷺ!) ہم آپ کو ان پر اُکسا دیں گے‘‘

ہم آپؐ کو ان کے خلاف بھر پور اور مؤثر اقدام کرنے کی اجازت دے دیں گے اور آپؐ کے ہاتھوں انہیں سزا دلوائیں گے۔

ثُمَّ لَا یُجَاوِرُوۡنَکَ فِیۡہَاۤ اِلَّا قَلِیۡلًا ﴿ۖۛۚ۶۰﴾

’’پھر وہ آپؐ کے پڑوسی بن کر اس (شہر) میں نہیں رہ سکیں گے مگر بہت تھوڑا عرصہ۔‘‘

مَّلۡعُوۡنِیۡنَ ۚۛ اَیۡنَمَا ثُقِفُوۡۤا اُخِذُوۡا وَ قُتِّلُوۡا تَقۡتِیۡلًا ﴿۶۱﴾

’’یہ پھٹکارے ہوئے لوگ ہیں‘جہاں بھی پائے جائیں گے پکڑ لیے جائیں گے اور بری طرح قتل کر دیے جائیں گے۔‘‘

یہ الفاظ اگرچہ اللہ تعالیٰ کی شدید بیزاری اور ناراضی کا مظہر ہیں مگر حضورﷺ کی سیرت سے منافقین کے خلاف ایسا کوئی اقدام ثابت نہیں ہے۔ اس سے یہی معلوم ہوتا ہے کہ حضورﷺ کو ایسا کوئی حکم باقاعدہ طور پر نہیں دیا گیا تھا۔

سُنَّۃَ اللّٰہِ فِی الَّذِیۡنَ خَلَوۡا مِنۡ قَبۡلُ ۚ

’’ اللہ کی یہی سنت رہی ہے ان لوگوں کے بارے میں بھی جو پہلے گزر چکے ہیں۔‘‘

وَ لَنۡ تَجِدَ لِسُنَّۃِ اللّٰہِ تَبۡدِیۡلًا ﴿۶۲﴾

’’اور تم ہر گز نہیں پائو گے اللہ کے طریقے میں کوئی تبدیلی۔‘‘

یَسۡـَٔلُکَ النَّاسُ عَنِ السَّاعَۃِ ؕ

’’(اے نبیﷺ!) لوگ آپ سے قیامت کے بارے میں پوچھتے ہیں۔‘‘

قُلۡ اِنَّمَا عِلۡمُہَا عِنۡدَ اللّٰہِ ؕ

’’ کہہ دیجیے کہ اس کا علم تو اللہ ہی کے پاس ہے۔‘‘

وَ مَا یُدۡرِیۡکَ لَعَلَّ السَّاعَۃَ تَکُوۡنُ قَرِیۡبًا ﴿۶۳﴾

’’اور تمہیں کیا معلوم ‘ شاید کہ قیامت قریب ہی آچکی ہو۔‘‘

اِنَّ اللّٰہَ لَعَنَ الۡکٰفِرِیۡنَ وَ اَعَدَّ لَہُمۡ سَعِیۡرًا ﴿ۙ۶۴﴾

’’بے شک اللہ نے کافروں پر لعنت فرمائی ہے اور ان کے لیے دہکتی ہوئی آگ تیار کر رکھی ہے۔‘‘

خٰلِدِیۡنَ فِیۡہَاۤ اَبَدًا ۚ

’’وہ اس میں رہیں گے ہمیشہ ہمیش۔‘‘

لَا یَجِدُوۡنَ وَلِیًّا وَّ لَا نَصِیۡرًا ﴿ۚ۶۵﴾

’’نہیں پائیں گے وہ کوئی حمایتی اور نہ کوئی مددگار۔‘‘

یَوۡمَ تُقَلَّبُ وُجُوۡہُہُمۡ فِی النَّارِ

’’جس دن ان کے چہرے آگ میں اُلٹ پلٹ کیے جائیں گے‘‘

یَقُوۡلُوۡنَ یٰلَیۡتَنَاۤ اَطَعۡنَا اللّٰہَ وَ اَطَعۡنَا الرَّسُوۡلَا ﴿۶۶﴾

’’(اس وقت) وہ کہیں گے: ہائے کاش !ہم نے اطاعت کی ہوتی اللہ کی اور اطاعت کی ہوتی رسولؐ کی!‘‘

وَ قَالُوۡا رَبَّنَاۤ اِنَّاۤ اَطَعۡنَا سَادَتَنَا وَ کُبَرَآءَنَا فَاَضَلُّوۡنَا السَّبِیۡلَا ﴿۶۷﴾

’’اور کہیں گے : اے ہمارے پروردگار ! ہم نے اپنے سرداروں اور اپنے بڑوں کی اطاعت کی تو انہوں نے ہمیں سیدھے راستے سے بھٹکا دیا۔‘‘

رَبَّنَاۤ اٰتِہِمۡ ضِعۡفَیۡنِ مِنَ الۡعَذَابِ وَ الۡعَنۡہُمۡ لَعۡنًا کَبِیۡرًا ﴿٪۶۸﴾

’’اے ہمارے پروردگار! تو ان کو دوگنا عذاب دے اور ان پر لعنت فرما‘بہت ہی بڑی لعنت۔‘‘